؍17ستمبر 1972؁ءمیں محترم جناب ابواللیث اصلاحی ندویؒ کی صدارت میں مرکز جماعت اسلامی ہند رامپورمیں ایک کانفرنس منعقد ہوئی اورمسلم بچیوں کے اس چھوٹے سے مدرسے کوجسے اب تک ’’بچیوں کا مدرسہ‘‘ کے نام سے جانا جاتا تھا، اعلیٰ دینی تعلیم کےادارے میں تبدیل کرنے کا فیصلہ لیا گیا۔ اور نومبر ۱۹۷۲؁ء میں عالمیت کی تعلیم کا باقاعدہ آغاز کردیا گیا۔اس وقت اس کا نام ’’جامعۃ الصالحات‘‘تجویز کیا گیا۔اسی نام سے اس ادارے کو عالمی پہچان ملی۔محترم جناب محمد عبدالحئ کے بعد۱۹۸۷؁ ءمیں محترم جناب توسل حسین صدیقیؒ کو ذمہ داربنایا گیا۔ انہوں نے ۱۹۹۳؁ ءمیں اپنی وفات تک نہایت دلجمعی، خوش اسلوبی اور اخلاص نیت کے ساتھ جامعہ کی خدمت کی۔ ان کے انتقال کے بعد عالم اسلام کے مایہ ناز مصنف ومفکر جناب مولانا محمد یوسف اصلاحی نےجامعہ کی ادارتی ذمہ داریاں سنبھالیں اوران کے خلوص نیت، انتھک محنت اوربے لوث خدمات کے باعث جامعہ ہر طرح سے تعمیر وترقی کی راہ پر گامزن ہوا۔آج جامعہ اپنی ایک خاص شناخت اور عالمی پہچان رکھتا ہے۔ملک کے ہر گوشے سے مسلمان بچیاں اعلیٰ دینی تعلیم کے لیے’ جامعۃ الصالحات‘ کا رخ کرتی ہیں، یہاں سے عالمہ وفاضلہ بن کر نکلتی ہیں اور اپنے اپنے علاقوں ، بستیوں اور محلوں میںمسلمان بچیوں اور عورتوں میں تعلیم وتربیت اور اصلاح و تبلیغ کا کام انجام دیتی ہیں۔